ما تمنعوش الصادقين عن صدقهم
و لا تحرموش العاشقين من عشقهم
كل اللى عايشين م البشر من حقهم
يقفوا و يكملوا .. يمشوا يتكعبلوا
و يتوهوا أو يوصلوا
و إذا كنا مش قادرين نكون زيهم
نتأمل الأحوال
و نوزن الأفعال
يمكن إذا صدقنا نمشى فى صفهم
**
الدنيا مالها و لا إحنا مالنا
و لا الزمان نسانا إيه جرالنا
بقينا نحبس فى الصدور سؤالنا
و نحسد الصادق على صدقه
و نقف بين العاشق و بين عشقه
نهرب من الصافيين إذا بكيوا
و نحسد الباكيين إذا ضحكوا
ما تمنعوش الصادقين عن صدقهم
و لا تحرموش العاشقين من عشقهم
ماتمنعوش - من مسلسل رحلة أبو العلا البشرى
كلمات : عبد الرحمن الأبنودى
ألحان : عمار الشريعى
غناء : على الحجار
No comments:
Post a Comment